Bapak, Ibu dosen ingkang tuhu
kinurmatan. Saha kanca-kanca Jurusan
Basa lan Sastra Jawi ingkang minulya. Keparenga kula badhe matur wonten ngarsa
panjenengan sami, minangka sesulih saking para kadang panitia. kula ngaturaken
puji sukur wonten ing ngarsanipun Gusti Ingkang Ngakarya Jagad. Inggih namung
saking kanikmatan lan nugrahanipun kula panjenengan sadaya ing wekdhal menika
tebih saking lir sambikala lan saged makempal wonten ing aula menika saperlu
sami mersani acara Pentas Budaya Jurusan Bahasa dan Sastra Jawa warsa 2014.
Kula ngaturaken panuwun dhumateng
sadaya kemawon ingkang kersa paring pambiyantu amrih kaleksananipun pentas budaya
menika. Mugi-mugi sadaya amal kesaenan kanca-kanca sadaya sami pikantuk piwelas
ingkang langkung kathah.
Kula sepisan malih tansah nyuwun
donga pangestu Bapak/Ibu dosen dalah kanca-kanca sadaya supados acara pentas budaya
warsa 2014 menika saged kaleksanan kanthi gancar. Mugi-mugi salajengipun
adicara menika saged ngrembaka dados acara ingkang nguri-uri kabudayan dalah
pendidikan kreativitas mahasiswa.
Salajengipun menawi wonten
kekirangan ingkang saged ndadosaken kirang renaning penggalih panjenengan
sadaya, kula nyuwun agunging pangaksami. Ing wasana cekap samanten.
Tidak ada komentar:
Posting Komentar